თბილისის ცენტრი „ენა, ლოგიკა, მეტყველება“

ცენტრი

ცენტრი "ენა, ლოგიკა, მეტყველება" თბილისის სახელმწიფო უნივერსიტეტის სამეცნიერო-საგანმანათლებლო ცენტრია, სადაც თანამშრომლობენ მეცნიერები აღმოსავლეთმცოდნეობის ინსტიტუტიდან, მათემატიკის ინსტიტუტიდან, მართვის სისტემების ინსტიტუტიდან, გამოყენებითი მათემატიკის ინსტიტუტიდან და თბილისის სახელმწიფო უნივერსიტეტიდან.

ცენტრი ინტერდისციპლინურ სამეცნიერო და საგანმანათლებლო საქმიანობას ეწევა, რაც მოიცავს საკითხებს ლინგვისტიკიდან, ლოგიკიდან და ინფორმატიკიდან.

ისტორია

სამეცნიერო-საგანმანათლებლო ცენტრი "ენა, ლოგიკა, მეტყველება"თბილისის სახელმწიფო უნივერსიტეტში 1994 წელს დაარსდა. ორი წლის შემდეგ, 1996 წელს, იგი ენის ტექნოლოგიების ევროპული ქსელის (ELSNET) პროექტის "ELSNET Goes East" (EGE) კოორდინატორი კვანძი გახდა, 1998 წლიდან კი ELSNET-ის წევრია.

ცენტრი 1995 წლის შემდეგ ყოველ ორ წელიწადში ატარებს ენის, ლოგიკის და გამოთვლების საერთაშორისო სიმპოზიუმს და საზაფხულო სკოლებს. ჟურნალი ენა, ლოგიკა, კომპიუტერიზაცია 2005 წლიდან გამოიცემა. ცენტრი თანამშრომლობს ნიდერლანდების, დიდი ბრიტანეთის, ავსტრიის, შვედეთის, იტალიის, შეერთებული შტატების, გერმანიის, რუსეთის უნივერსიტეტებთან, ინსტიტუტებთან და პროფესიულ საზოგადოებებთან. ცენტრის ბევრი ყოფილი წევრი ამჟამად დასავლეთის სხვადასხვა უნივერსიტეტში მუშაობს.

ცენტრის ადრეული ისტორიის შესახებ მოთხრობილია სტატიაში "Does ELSNET No Longer Go East?", რომელიც ELSNET-ის ბიულეტენ ELSNews-ის 2000 წლის 9.1 ნომერში გამოქვეყნდა.

მისია

ცენტრის მიზანია ხელი შეუწყოს საქართველოში ენის, ლოგიკის და გამოთვლების საკითხებზე კვლევების და განათლების განვითარებას უცხოურ ცენტრებთან და უნივერსიტეტებთან კონტაქტების გაძლიერებით, სტუდენტთა, ახალგაზრდა მეცნიერთა და ლექტორთა გაცვლის ინტენსიფიცირებით, სიმპოზიუმების და საზაფხულო სკოლების სერიების გაგრძელებით და საქართველოს უნივერსიტეტებში ენის, ლოგიკის და ინფორმატიკის დარგებში სისტემატური სასწავლო კურსების ორგანიზებით.